CEBU - Tulo ka amateur boxers, kinsa nihakot og mga medalya atol sa National Open Amateur Boxing Tournament niadtong Hulyo didto sa Iloilo City ang mopakita'g labok sa labing unang higayon isip pro karong Nobiyembre 16 diha sa dakbayan sa Lapu-Lapu ubos sa landong sa RWS Stable ni Rex 'Wakee' Salud.
Ang tulo mao sila si Rob 'Gun' Montero, ang national open gold medalist sa bantamweight division, RJ 'Sharp' Anoos, ang gold medalist sa featherweight division ug Renren 'Kilat' Abendan, ang bronze medalist sa flyweight division.
Sila maoy supporting bouts sa boxing card nga pangulohan sa pambato sa RWS Rodulfo 'The Sting' Sumabong batok ni Johnrey Verano sa Leolet Stable sa Bukidnon.
Mopakita sab og aksiyon mao si Jayson 'Gladiator' Siaton, kinsa makigsangka ni Renan Branzuela sa Leolet Stable. – BANAT NEWS