CEBU - Duha ka Sugbuanon ang moapil sa lahugay sa beach volleyball event sa 2008 Asian Beach Games karong Oktobre 18-26 sa Bali, Indonesia.
Ang duha mao sila si Jusabelle Brillo ug Junrey Sasing. Si Brillo maoy nakasulod sa RP volleyball team, samtang si Sasing karon pa lang naapil sa elite squad.
Si Sasing dili unta buot nga moapil sa nasudnong koponan kay masakripisyo ang iyang trabaho dinhi sa Sugbu gumikan kay ang ilang training adto man himoa sa Manila.
Sa iyang bahin, si Brillo mohunong una sa iyang pagtungha sa University of the Visayas (UV) aron mangindahay sa iyang maayong palad uban sa RP Team.
Si coach Dante 'Nonoy' Lopez uyon nga si Sasing anhi mohimo og ensayo, apan kinahanglan nga mogahin kini og pipila ka adlaw nga ensayo uban sa iyang teammates sa dili pa kini manulong sa Indonesia.
Gitug-an ni Lopez nga sama ni Brillo ang team nagkinahanglan sab sa serbisyo ni Sasing.
Gisaysay ni Lopez nga si Sasing maoy labing maayong Sugbuanon beach volleyball player nga iyang nakit-an sa gipahigayong Nestea Beach Volley Tournament sa milabay'ng duha ka tuig. – BANAT NEWS