CEBU - Gipadaku ug gipanindot ang aksiyon sa Lapu-Lapu City Fiesta Lawn Tennis Tournament nga ulohan nga "1st Mayor Arturo Radaza Cup" nunot sa pagdugang sa Open A doubles category.
Ang tinuig nga kalihukan sugdan karong Domingo sa alas-3 sa hapon diha sa Lapu-Lapu City tennis courts.
"We are holding this tournament yearly but what makes this year's edition bigger and more exciting is the addition of the Open A category. This could not have happened without the support of the city government," matud pa ni city councilor Junard 'Ahong' Chan, ang chairman sa organizing committee.
Sa pagka karon, miabot na og 16 ka parisan gikan sa Sugbu ang nipadayag sa ilang partisipasyon.
Matud pa ni Chan nga ila sab nga giawhag ang out-of-town players sa pagsalmot sa maong kompetisyon.
Ang mga entrante nagagikan sa Cecile Tennis Club, Mactan Air Base TC, Timex TC, GMC TC, Keppel TC, Virlo TC, Y Club, Marigondon TC, Camella TC ug MILTSCI.
Gawas sa Open A, ang uban pang mga kategoriya nga tigian mao ang C Plus ug C Minus (beginners), ladies (eksklusibo lamang sa mga residente sa Lapu-Lapu) ug Century Old (niadtong paresan nga kuramboson ang edad moabot og 100 ka tuig).
Aduna say 16-under ug 12-under age classification nga bukas lamang niadtong mga molupyo sa Lapu-Lapu.
Ang registration fee sa Open A nagkantidad og P200, samtang ang mga magduduwa sa ubang mga kategoriya mobayad og P250 libre na ang souvenir t-shirt.
Gidasig ni Chan ang tanang mga partisipante sa pagsalmot sa parada diin isunod ang opening ceremony.
"They should join the parade because after this, there will be drawing of lots. If they're not present, they will be automatically forfeited," matud pa ni Chan. – BANAT NEWS