CEBU - Padayong mihakot og daog ang defending champion Don Bosco Technology Center (DBTC) ug ang University of Southern Philippines Foundation (USPF) pinaagi sa pagpukan sa ilang tagsa-tagsa ka kaatbang sa secondary division sa 2008 Cebu Schools Athletic Foundation, Inc. (CESAFI) football event kagahapon didto sa USC Technology Center- Talamban, ning siyudad.
Ang Don Bosco misiro sa University of San Jose-Recoletos, 7-0, samtang gisirohan sab sa USPF ang University of San Carlos (USC)-North Campus, 6-0.
Si Peter Ricamora maoy nangulo sa kadaugan sa Don Bosco pinaagi sa pag-iskor og upat ka goals sa 22nd, 45th, 48th ug 50th minutes.
Si Miko Limalima maoy unang mihatag og iskor sa DBTC, samtang si Charles Caballes miposa og duha ka goals sa 26th ug 33rd minute alang sa ilang dakung kadaugan.
Sa laing bahin, ang USPF wala motugot sa USC-North nga maka-iskor sa ilang mainitong duwa hinungdan duha ka mga players gikan sa duha ka kampo ang nakakuha og yellow cards sa first half.
Si Jephunneh Pelanio maoy mihatag sa una ug katapusang goal alang sa USPF. Naka-goal sab sila si Glovin Chavarria, Joel Mher Sayre, Lopito Tumulak Jr. ug Paolo Joven Lapasaran.
Sa college division, ang USC milansang sab sa ilang ikaduhang daog pinaagi sa pagpukan sa Cebu Doctors University (CDU), 3-0. - BANAT NEWS