CEBU - Buksan na karong adlawa ang gipaabot nga 3rd Congressman Red Durano Cup Inter-Town Basketball Tournament diin ang defending champion Liloan moharong sa runner-up niining Sogod diha sa Danao City Sports and Civic Center.
Sa dili pa ang gikahinaman nga Liloan-Sogod showdown, upat ka teams gikan sa island area ang magsangka sa usa’g usa.
Ang Poro, ang top team sa islanders makigtigi sa San Francisco, samtang ang Pilar moharong sa Tudela.
Sa main game, ang defending champion Liloan moparada gihapon sa susamang line-up nga nidaog sa titulo sa miaging tuig. Si Mayor Vincent Franco ‘Duke’ Frasco bugtong nadugang sa line-up.
Usa ka mubong programa ang ipahigayon nga pagatambongan nilang Cebu 5th District Rep. Red Durano, iyang amahan nga si Danao City Mayor Ramon ‘Nito’ Durano III ug Provincial Board Member Agnes Magpale.
Sa maong torneyo, ang mga teams sa island moduwa og single round robin format diin ang top qualifier moabante sa semifinals uban sa top three seeds sa mainland area. - BANAT NEWS