CEBU - Nahiapil na sila si Ramie Laput ug Marvin Sonsona sa taas nga listahan sa Filipino WBO regional title-holders human sa ilang impresibo nga kadaugan pinaagi sa pagpaundang sa ilang tagsa-tagsa ka kaatbang sa “Saga in Naga” boxing extravaganza niadtong Sabado sa gabii didto sa Naga City Sports Complex.
Si Laput midaog pinaagi sa third round TKO batok ni Thai Mongkolchai Singmanassak aron pagsakmit sa interim WBO Asia Pacific bantamweight title, samtang si Sonsona mipaundang ni Joel Rafols aron paglangkat sa bakanteng AsPac Youth flyweight belt.
Ang bagsik nga si Laput mirumbo sa ulo ug sa tiyan ni Singmanassak, kinsa nagpunga-punga sa pagpanagang sa makabungog nga suntok hinungdan nga giundang sa referee ang away sa oras nga 1:32 sa ikatulong hugna.
Ang away tali nilang Fernando Lumacad ug Saensaknoi Nor Muangklang miresulta sa split daw.
Sa laing away, si Ryan Tampus nagkinahanglan lang og 46 segundos aron pagtumba ni Reil Mandate, si Ronald Castrodes nidaog pinaagi sa split decision batok ni Fabio Marfa sa makalingaw nga super flyweight fight, si Jestoni Pepito mipaundang ni Joon Woon Choi sa Korea sa round four, samtang si featherweight Rolando Magallano midaog pinaagi sa unanimous decision batok ni Dison Cag-ong.
Ang “Saga in Naga” gipasiugdahan ni Sammy Gello-ani sa SGG Sports Promotions uban sa kagamhanan sa dakbayan sa Naga ubos sa liderato ni Mayor Val Chiong, Viva Sports, Tanduay ug Omega Boxing Gym. (BANAT NEWS)