CEBU - Sa labing unang higayon human sa tulo ka duwa, mikulit na gyud og daug ang Golden Eye nga gipangulohan sa ilang captain ball nga si Noel Medalle ug usa ka impresibong kadaugan ang ilang gihimo dihang ilang gipanitan ang kanhi wa’y pilde nga Warriors sa iskor, 90-75 kaniadtong Huwebes sa gabii atol sa nagpadayon nga F. Llamas Youth Association (FYA) 1st Coach Rady Cup basketball tournament didto sa Vicente Sotto Memorial Gym sa barangay Punta Princesa ning dakbayan.
Ang kanhi SIT Baby Skyblazer nga si Janus Abellana sayo kaayong nanginit sa iyang opensa ug na-igo ang Golden Eye sa ilang tirada sa gawas ug dihang misalmot na sa opensa sila si Tristan Rama ug Medalle, wala na sila kapugngi sa Warriors kinsa nasugamak sa una nilang pilde sulod sa tulo ka duwa.
Ang Warriors kinsa midaug batok sa Viking Haulers sa miaging semana, naghupot na karon og 2-1 nga baraha kauban ang Viking sa liderato.
Ang Viking Haulers midaug sab batok sa Lakers sa iskor 100-95 nga naghatag sa nauwahi og 1-2 nga baraha aron pagtabla sa Golden Eye sa parehong 1-2 nga baraha.
Magpadayon ang double round robin series unya sa Huwebes sa gabii.
Samtang mibahug sila si Abellana ug kanhi UC Junior Webmaster Dominic Enriquez, kalit lang usab misalmot sa opensa sila si Rama ug Medalle aron pagdominar sa duwa ug wala na nila hatagi og kahigayonan nga makasikit pa og usab ang Warriors nga gipangulohan nila ni Elot Cadungog ug Chrissas Llegunas kinsa mihagdaw og 20 ug 19 puntos.
Sa laing bahin, si Tata Laborte mipusa sab og 26 puntos aron pangulohan ang Viking Haulers sa pagpahubas sa Lakers.
Matag semana, ang duwa gitambongan nila ni Kapitan Rolly Diorico sa Punta Princesa ug Konsehal Bugoy Atillo nga parehong mahiligon sa basketbol.
Puntos kada usa:
First Game:
Golden eye (90)—Abellana 21, Enriquez 18, Rama 14, N. Medalle 13, Marata 6, Jobern 3, Bas 3, Osorio 3, Cedeño 2, Bantiling 2
Warriors (75)—Cadungog 20, Llegunas 19, Pong 14, Enriquez 14, Abella 7, Alob 2, Cambarihan 2
Second Game:
Viking Haulers (100)— T. Laborte 26, Kevin 20, Llegunas 17, Zapanta 13, B.Medalle 7, Arreglo 6, N. Laborte 6, Shun 4, Kino 3, Chummy 2, Trinidad 2
Lakers (95)— Rollon 26, M. Enriquez 18, C. Rama 16, V. Canceko 16, G. Canceko 6, En-en 6, Garcia 3, Paul 3, Wilson 3, Jao 2. – BANAT NEWS