CEBU - Ang idlas nga si Archie Coros maoy nangu sa Mandaue Jaycees pagmakmak sa Monday Club, 72-49 aron paglangkat sa korona sa Barkadahan Hoops niadtong Domingo didto sa City Sports Club sa Ayala.
Si Coros, kanhi pointguard sa USC Warriors, mibahog og 11 puntos, apan ang iyang mga maayong assists ngadto sa iyang kaubanan nakahatag og hapsay nga duwa sa ilang koponan.
Atol sa iyang panahon sa commercial league diin niduwa siya sa Baseline Restaurant, si Coros uban ni ex-pro Lou Regidor, gibansagan og “giant killers” sa nabungkag na nga Cebu Basketball League (CBL).
Ang Mandaue Jaycees nga kanunay naglabaw gikan pagsugod sa duwa miposte og 22 puntos nga bentaha sa first half, 47-25.
Tungod sab sa kahugot sa ilang depensa, naglisod pagkuha og puntos ang Monday Club. Walay bisan usa ka player sa Monday Club ang nakahimo og double figures kay ang ilang leading scorer nga si Boy Alfeche igo lang mi-iskor og nuybe puntos.
Si Charlie Tolentino, ang tag-iya sa Castle Peak Hotel ug nagduwa sa Wednesday Club maoy mihatag sa tropeyo ngadto sa Mandaue Jaycees atol sa awarding ceremony pipila lang ka gutlo human sa duwa.
Unom ka teams ang nisalmot sa Barkadahan Hoops lakip na niini ang team sa Rama Boys nga gipangulohan ni Cebu City Vice Mayor Michael Rama.
Puntos MATAG USA
Mandaue Jaycees (72) -- Alcantara 16, Cortes 14, Luthers 12, Coros 11, Garcia 9, Gamallo 6, Balbuena 6, Ong 4, Latonio 3
Monday Club (49) --Alfeche 9,Perez 8, Butsoy 7, Paculaba 5, Nepomuceno 4, Adolfo 4, Tabucanon 4, Montenegro 2, Kamingaw 2 (BANAT NEWS)