CEBU – Si Cebu City Mayor Tomas Osmeña ug si Congressman Raul del Mar maoy mga pinasidunggang dinapit ug mamumulong sa ipahigayong pagbukas sa 2nd Barangay T. Padilla Basketball Association (BTBA) Manager’s Cup Basketball Tournament karong buntag didto sa Kiwanis Sports Complex, T. Padilla ning siyudad.
Gawas ni Osmeña ug del Mar gipaabot sab motambong sila si Vice Mayor Michael Rama, City Councilors Jack Jakosalem, Dr. Chris Alex, Jun Pe, Cutie del Mar ug si Brgy. Captain Mike Ralota.
Sugdan pinaagi sa usa ka Santos nga Misa sa alas 8:00 sa buntag ug isunod dayon ang parada sa mga partisipanteng koponan ug mga opisyales nga maoy motimaan sa pormal nga pagbukas.
Dose ka teams nga sakop sa BTBA ubos sa liderato sa ilang presidente nga si Jun Acero ang mag-ilog sa titulo sa maong torneyo.
Kini pangulohan sa defending champion Ralota Boys Gray, McMill, First Engine Rebuilder Inc. (FERI), MCL, VRG Engg., Filipino Craft, Dexiene, Day-as, Francisco Team, Castro/Mendoza VHL, Briones ug PNP/CITOM. – BANAT NEWS