CEBU - Ang Icomm ug ang House of Hope milampurnas sa ilang tagsa-tagsa ka kaatbang sa nagpadayong 7th Thirsty Hoop Jams Basketball Tournament didto sa BRIGHT Academy Gym sa Banilad, ning siyudad.
Si Jeffrey Padernal mibundak og 22 puntos ug si Rodelio Lagahit midiga og 10 puntos alang sa Icomm kinsa mipakaging sa Alliance Software, 54-46, samtang si Romero Membrillo ug Roel Patunob miligwat og 13 puntos matag usa aron pangulohan ang House of Hope nga mipaluhod sa VECO, 72-67.
Kuwatro puntos lang ang labaw sa Icomm sa unang kuwarter, 11-7 ug tungod sa padayong kainit sa ilang duwa, nainat ang labaw ngadto sa sayes puntos, 41-35 sa third quarter.
Ang Icomm mipatuman sa ilang hugot nga depensa aron pagsanta sa mga opensiba sa Alliance Software ug ingon man pagposte og otso puntos nga kadaugan.
Si Raymond Rizada mao lang ang bugtong player nga nakakuha og double figure alang sa Alliance Software sa iyang 12 puntos.
Sa laing bahin, ang House of Hope nagsangkiig human maalkanse og otso puntos sa first quarter, 15-23, apan nakabawi kini sa sunod nga hugna aron matabla ang duwa sa halftime, 33-all.
Sa third period, ang House of Hope hinay-hinay nga mibuwag aron pag-ilog sa labaw, 53-49 sa dayong entra sa final quarter.
Ang trayanggulo nilang Jimmy Abello, Erwin Aranas ug Joseph Filoteo nagkumboya og 25 puntos alang sa House of Hope.
Samtang si Bailey del Castillo mirehistro og game-high 25 puntos alang sa nasukarap nga VECO.
PUNTOS MATAG USA
Unang duwa:
Icomm (54) - Padernal 22, Lagahit 10, Canada 7, Enoveso 6, Buenaventura 3,Estrada 2, Quitor 2, Benedicto 2
Alliance Software (46) - Rizada 12, Huerte 7, Miñoza 7, Tinapay 6, Abringe 4, Demecillo 4, Marañan 4, Candia 2
Ikaduhang duwa:
House of Hope (72) - Membrillo 13, Patunob 13, Abello 9, Aranas 9, Filoteo 7, Cabarrubias 6, Amodia 5, Lequin 4, Castañares 2, Mercado 2, Ebarle 2
VECO (67) - Del Castillo 25, Cataylo 7, Ching 7, Grafil 7, Lacson 7, Espinosa 5, Canen 3, Santos 2, Rabillas 2, Rodriguez 2 (BANAT NEWS)