Kompirmado na nga Talisay City mopahigayon sa labing unang higayon og usa ka international boxing event karong Oktubre 3 sa alas 6:00 sa gabii diha sa Talisay City Sports Center sa dakbayan sa Talisay.
Ang maong away pagaulohan og "Fight Night in Talisay" diin mo-away sa main event mao si Ciso 'Kid Terrible' Morales batok sa Thai nga si Thong Thai Rajanondh alang sa World Boxing Organization (WBO) Oriental boxing championship.
Ang maong boxing card gipasiugdahan sa Golden Dream Promotions nga gipangulohan ni Resty Seville sa abag sa SGG Promotions ni Sammy Gello-ani, Talisay City Amateur Boxing Association (TACABA) ug Talisay City Sports Commission.
Si Morales malampusong nakadepensa sa iyang World Boxing Oriental super bantamweight crown batok ni Thai Narongnoi Or Maungkang sa "Collision at the Coliseum" niadtong Hulyo 19 sa Cebu Coliseum.
Ang mga away sa undercard padayon pang gihikay ug gikatahong mga boksidor gikan sa Korea ang posibleng moaway batok sa Pinoy boxer.
Ang mga amateur boxers sa TACABA sama nila ni undefeated Kitseron Garces, Marco Pumar ug Bob Anthony Bacus ang mopakita usab sa ilang abilidad.
Alang sa ticket reservation mahimong motawag sa 516-6313 (Resty Seville) og 516-9221 (Charles Basillote).
Alang sa dugang mga kasayoran, mahimo sab nga mobisita ni Capt. Basillote sa Dumlog Barangay Hall. - BANAT