Sa tulo ka nangaging mga duwa niini nga season, ang Cebu Institute of Technology (CIT) Wildcats mi-iskor og record low sa 2008 Cebu Schools Athletic Foundation, Inc. (CESAFI)
Alang sa team kinsa naka-abante sa CESAFI finals batok sa University of the Visayas (UV) Green Lancers niadtong 2000, subo kaayo nga palandungon nga kini mao kanunay nilang madangatan sa CESAFI nga angay hinuktokan sa tagdumala kun usa pa ba kini ka maayong publicity alang sa tunghaan.
Niadtong Huwebes, gipulbos sa Southwestern University (SWU) Cobras ang Wildcats sa iskor nga 108-45. Ang 58 puntos nga kadaugan sa Cobras nakulit isip labing daku nga losing margin sa 8th CESAFI season.
Salamat ni Eulogio Lamosa kinsa mi-iskor og duha ka three-point basket nga maoy misalbar sa Wildcats sa posible untang world record isip koponan nga nasirohan sa tibuok 10 minutos sa duwa.
Unang napasulod ni Lamosa ang iyang triple sa 1:48 sa first period alang sa 3-20 nga iskor ug gisundan kini sa nahabiling 40 segundos alang sa 6-25 nga iskor ug gitapos sa Cobras ang first period sa iskor nga 27-6.
Niadtong Agosto 5, napugngan sab sa University of San Carlos (USC) Warriors ang Wildcats sa 6-22 sa first quarter aron pag-iskor og 80-45 nga kadaugan. Sa miaging Miyerkules, mao gihapon ang nadangatan sa Wildcats ug unom lang gihapon ka puntos ang ilang nahimo sa fourth period batok sa University of Southern Philippines-Foundation (USPF) Panthers, kinsa maoy midaog sa duwa, 84-67.
Hayan dili na gyud makatilaw og daog ang Panthers sa elimination round kay ang katapusan nilang kontrahon mao ang University of Cebu (UC) Webmasters ugma sa dili pa ang dakung kumbati tali sa USJ-R Jaguars (6-0) ug UV Green Lancers (5-1) nga sayong gituohan nga maoy mag-abot sa finals.
Si Alfred Belande maoy nangu sa Cobras sa iyang 21 puntos, samtang si Clifford Maguate mitampo og 11 puntos, pakapin ang siyam ka rebounds ug si Joseph Escober igo lang mi-iskor og kuwatro puntos apan aduna kini 10 ka assists.
Si Lamosa lang ang nakahimo’g double digits sa Wildcats pinaagi sa iyang 12 puntos.
Puntos Matag Usa
SWU (103) -- Belande 21, Litorja 12, Ceniza 12, Maguate 11, Django 10, Pacquiao 10, Ompad 8, Jalandoni 8, Escober 4, Divinagracia 4
CIT (45) -- Lamosa 12, de la Cerna 8, Molero 8, Reyes 7, Villarba 4, Resilla 4, Lopez 2