Sa dili pa ang akto nga sinukliay sa kumo, ang mga nag-unang protagonista sa gikahinaman nga “WBO Night of Champions” card magsinukliay una og pulong dihang mag-abot kini sa pre-fight news conference karong alas-11:00 sa buntag diha sa Aegan room sa Waterfront Cebu City Hotel and Casino sa Lahug, ning siyudad.
Ang Bol-anong ring warrior si Rey ‘Boom-Boom’ Bautista ug Donnie ‘Ahas’ Nietes maoy sentro sa eksplosibong double-header nga gipasiugdahan sa ALA Promotions uban sa abag sa ABS-CBN Sports karong Sabado diha sa Pacific grand ballroom sa Waterfront Hotel.
Si Bautista manalipod sa iyang WBO Intercontinental super bantamweight title batok ni Eden Marquez sa Mexico, samtang si Nietes, ang unang world champion gikan sa nabantog nga ALA Stable, modepensa sa iyang korona sa labing unang higayon batok ni Eddy Castro sa Nicaragua.
Sila si Marquez ug Castro nipakita sa ilang abilidad atol sa public workout kagahapon didto sa ALA Gym sa Banilad Town Center.
Sa undercards, ang misubang nga mga bitoon sa ALA Gym mopakita sab sa ilang abilidad batok sa tagsa-tagsa nila ka kaatbang. Sila mao si WBO Asia Pacific Youth lightweight champion Jason Pagara, super bantamweight Jomanz Omanz, bantamweight Ray Las Piñas ug light flyweight Jercion Mancio.
Si Pagara makigbinukbukay ni Thai prize fighter Kongdej sa gubat sa batan-on batok sa beterano. Si Pagara manghod og 14 ka tuig itandi sa bisitang Thai boxer.
Si Mancia, kinsa gikan sa Esperanza, Agusan del Sur ug ang jr flyweight champion sa miaging tuig nga television series “Idol: Search for the Next Pinoy,” moharong ni Mario Sison sa Elorde Stable.
Sa laing bahin, si Las Piñas makigsinukliay og kumo batok ni Gedion Amba sa Lapu-Lapu City, samtang si Omanz moharong ni kanhi WBC International bantamweight champion Roger Galicia.
Mapalit ang mga tiket sa mosunod nga mga outlets: ALA Promotions Office, ALA Gym Banilad Town Center ug sa Shang Mactan Town Center, Islands Souvenirs, Bisaya Ispisyal ug USA Sports boutiques sa Ayala ug Marfori Bakeshop sa Mandaue.
Alang sa ticket reservations, mahimong motawag ni Jeana sa 0928-5057980 o dili ba ni Brent sa 0917-3253005.