Lima ka libo ka pesos ang gipamulta sa Philippine Basketball Association (PBA) sa magduduwa sa Barangay Ginebra nga si Mark “The spark” Caquioa tungod sa nasakmit niining Flagrant foul Penalty 1 batok ni Arwind Santos sa Air21 Express niadtong miaging Domingo sa nagdilaab nga game-6 sa PBA Best-of-Seven Series sa finals didto sa Araneta Coliseum.
Ang teammate usab niini nga si Junthy Valenzuela nakamulta og usa ka libo ka pesos, ubos-ubos sa multa ni Caguioa tungod sa iyang pagtukmod ni Ranidel de Ocampo sa Air21 bisan kun gipituhan na kini sa referee. Tungod usab sa maong aksiyon, ang referee mideklarar og technical foul batok ni de Ocampo.
Nakahiagom usab og duha ka technical foul si Valenzuela tungod sa pagpakiglamok-lamok niini batok ni Gary David hinungdan nga wala na kini hatagi og higayon nga makapadayon sa pagduwa.
Gibutyag ni PBA commissioner Sonny Barrios nga ang iyang opisina “found sufficient grounds to waive the fine for the second technical foul.”
Si Caguioa ug Valenzuela mibisita na sa opisina ni Barrios niadtong miaging Lunes dihang gipatawag kini samtang si David usab didto tungod sa iyang naangkon nga technical foul.
Didto usab sa opisina ni Barrios ang player sa Express nga si Niño Canaleta tungod sa Flagrant Foul Penalty 1 nga naangkon niini batok ni Paul Artadi.