Gipatapsingan sa Boysen Paints ang Golden Lines alang sa labing una nilang daug sulod sa lima ka duwa sa iskor, 85-84 sa pagsugod sa second round of elimination sa Vic Enterprises Invitational basketball tournament didto sa CEC gym.
Ang Golden Lines sayong naka-una ug may 33-19 nga abante sa pagsugod sa first quarter apan mihinay-hinay og kamang ang Boysen sa halftime aron mosikit og gamay, 40-49.
Sa third quarter, ang Boysen maoy nakahigayon pagpabuhagay og puntos hangtod ilang natabla ang iskor sa 64-all padung na sa kataposang kwarter.
Human sa taud-taud nga sinukliay og puntos, nakakuha’g usa ka punto sa free throw line si Jay Ramodes sa kataposang 12 segundos aron pagbu-ak sa 84-all alang sa 85-84 nga kadaugan.
Si Mark Capili maoy nangu sa Boysen sa iyang 21 puntos samtang si Ramodes mi-iskor og 12 puntos lakip ang frebbie nga maoy naghatod kanila sa labing unang daug alang sa 1-4 nga baraha. Ang Golden Lines gipangulohan ni Roel Sestoso kinsa mipuntos og 21 samtang sila si Alex Cainglet ug George Uy parehong may 13 puntos. Ang Golden Lines aduna nay 2-2 nga baraha.
Sa laing duwa, midaug ang Ave Maria Sanctuary Park batok sa Unilink Shipping, 85-80 aron pagtabla sa record sa ilang biktima sa parehong 2-1 nga baraha.
Si Freddie Latosa nga kanhi magduduwa sa USJR Jaguars maoy nangu sa Ave Maria sa iyang 18 puntos ug gisundan ni ex-pro Marlon Piodo kinsa may 17 puntos.
Si Aaron Pancho kinsa usa sa sinaligan sa Lapulapu City Chiefs sa Inter-City League mi-iskor og 20 puntos alang sa Unilink.
Puntos kada usa:
First Game:
Boysen (85) — Capili 21, Ramodes 12, Manubag 11, Dicatoria 10, Laguna 8, Tan 6, Abella 5, Choachuy 3, Lim 3
Golden Lines (84) — Sestoso 20, Cainglet 13, Uy 13, Cenabre 12, Labares 12, Armenion 8, Lunday 6.
Second Game:
Ave Maria (85) — Latosa 18, Piodo 17, Hatague 10, Desuyo 7, Tubo 7, Lapiz 6, Estudillo 5, Pogoy 4, Belano 4, B. Senining 4, R. Senining 3
Unilink (80) — Pancho 20, Grogard 13, R. Aniñon 12, Labajo 9, Yap 8, E. Aniñon 8, Baclay 6, Caparas 2, Cromwell 2.