Gipanglampaso sa Golden Lines Shipping ug Unilink Shipping ang ilang tagsa-tagsa ka kaatbang kaniadtong Domingo sa nagpadayon nga Vic Enterprises Invitational basketball tournament didto sa CEC gym sa dalan Dimasalang, ning dakbayan.
Ang Golden Lines ni George Uy, milubong sa Ave Maria Sanctuary Park, 132-118 sa overtime samtang giyapo sa Unilink ang Boysen Paints, 105-87 sa usa ka one-sided nga duwa sa pagsugod hangtod nahuman.
Nasalbar ni kanhi USP Panther Elvis Labares ang Golden Lines kinsa nabiya-an og tulo ka puntos sa daginotong oras, 109-112 dihang misulod ang iyang three-point shot sa kataposang duha ka segundos aron paghatod sa duwa ngadto sa five-minute overtime aron taposon ang regulation sa 112-all.
Atol sa overtime period, gipahugtan sa Golden Lines ang ilang depensa ug mao kini hinungdan nga milubad ang Ave Maria ug wala na makasustenir.
Mao lang kadto’y ikaduhang daug sa Golden Lines kinsa adunay tulo ka pilde samtang ang Unilink adunay 2-0 nga baraha.
Si Alex Cainglet mihipos og 35 puntos aron pangulohan ang Golden Lines samtang si Labares mihakot og 25 puntos ug sila si Aris Jayme ug Randy dela Pisa parehong may 18 puntos.
Ang ex-pro nga si Marlon Piodo miwadwad og 36 puntos alang sa Ave Maria ug si Ian Desuyo mi-iskor og 20 puntos. Sa laing bahin, si Norwin Baclay ug Ramil Aniñon maoy nangu sa Unilink sa ilang 23 ug 19 puntos ug si Chris Matunog may 23 puntos alang sa 0-2 nga Boysen.
Puntos kada usa:
First Game:
Golden Lines (132)—Cainglet 35, abares 25, Jayme 18, Dela Pisa 18, Armenion 12, Lunday 6, Cuyno 4, Cenabre 4, Sestoso 4, Quirante 4, Ortega
Ave Maria (118)—Piodo 36, Desuyo 20, Belano 15, Tubo 14, Rodriguez 12, Pogoy 10, Senining 8, Salacut 3
Second Game:
Unilink (105)—Baclay 23, R. Aniñon 19, Labajo 17, e. Añinon 14, Gabatan 12, Caparas 10, Yap 6, Cromwell 4
Boysen (87)—Matunog 23, Laguna 16, Suico 10, Abella 9, Perez 7, Dicatoria 7, Dy 6, Choachuy 5, Bordador 4