Ang Sportswriters Association of Cebu (SAC) mosuporta sa ipahigayong “Y101 Skins for Heart” golf tournament nga gikatakda karong Sabado diha sa Alta Vista Golf and Country Club sa Pardo, ning siyudad.
Nisantop sa alimpatakan sa mga sakop sa SAC ang pagsuporta sa maong kalihukan, nga usa ka fund raising alang sa mga biktima sa bagyong Frank isip ilang paagi pagtabang ngadto sa lungsoranon.
Upat ka Filipino professional golfers ang mosalmot sa maong kompetisyon.
Si Joseph Stevens, ang vice president for operations sa Y101 FM nagkanayon nga sila si Gerald Rosales, Gerard Cantada, Marlon Dizon ug Roger Retuerto ang nikompirmar nga moapil sa 18-hole event, ang labing una sa nasud.
“This time they play for charity,” matud pa ni Stevens.
Ang “Skins” usa ka format sa golf competition diin ibutang ang premyo sa matag lungag. Kun ang player modaog sa partikular nga lungag modaog siya og skin o premyo nga giandam, apan kun adunay panagtabla, ang premyo madala sa sunod nga lungag.
Si Martha Tuason, ang CECO sa Y101 FM mipadayag sa iyang pasalamat ngadto sa officers ug management sa Atla Vista tungod sa gihatag nga suporta ning maong proyekto.
Lain pang mipadayag sa ilang intensiyon nga mosuporta sa kalihukan mao ang Armscor, ICTSCI, First Gentleman Foundation, San Sebastian, LBC, Philips ug Nissan.
Mihatag sab sa ilang suporta ang Dos Mestizos, Petron, Loft ug ang Graphic Star.