Gitugotan na sa Golden Boy Promotions si World Boxing Organization (WBO) bantamweight champion Gerry Peñalosa nga mohimo sa iyang title defense batok ni Nestor Rocha dinhi sa Pilipinas.
Ang away nga gikatakda karong Septiyembre 20 adto himuon sa Tubod, Lanao del Norte.
Si Peñalosa orihinal unta nga makigsangka ni Rocha sa undercard sa Joel Casamayor-Juan Manuel Marquez WBO lightweight championship karong Septiyembre 13 sa MGM Grand sa Las Vegas.
Gumikan niini, si Peñalosa nangaliya nga patas-an ang iyang $100,000 ngadto sa $150,000. Apan ang iyang manedyer nga si Billy Keane mipahibalo kaniya nga ang Golden Boy Promotions lang ang bugtong mohatag og increase sa kantidad nga $130,000.
Mao kini nakapaaghat kaniya sa paghikay sa plano aron mapahigayon ang away dinhi sa Pilipinas.
Iya gipakigtagboan si Ozamiz City Rep. Abdullah Dimaporo. Matud pa niya nga ang kongresista uyon nga mogahin og $300,000 ug miduso sa Memorandum of Agreement ngadto ni Peñalosa.
Nangayo sab og panabang si Peñalosa sa SGG Promotions ni international boxing promoter Sammy ‘Don King’ Gello-ani, kinsa miuyon sab nga mohikay sa title fight uban sa panabang nilang Bong Yap sa Black Scorpion Gym ug Dimaporo.