Adunay dakung posibilidad nga si IBF/WBA/WBO lightweight champion Nate Campbell maoy sunod makontra ni WBC lightweight champion Manny ‘Pacman’ Pacquiao bisan pa ang walay pildeng Venezuelan knockout artist nga si Edwin Valero maoy nag-unang kandidato nga sunod harungon ni Filipino superstar, sumala pa sa Sugbuanong promoter nga si Rex ‘Wakee’ Salud.
“It’s true that negotiations are underway for a Pacquiao-Valero fight on November 8 because as of now, Valero is the only available opponent for Manny,” matud pang Salud, ang manedyer ug sinaligan ni Pacquiao.
“Valero is undefeated with all his wins by knockout in the first round but he is not really that well-known and popular. He hasn’t fought yet top caliber foes. For me, Nate Campbell is the more attractive opponent for Pacquiao. The good thing about Campbell as a foe is that Pacquiao will already have seven belts if Pacquiao beats him,” dugang pa ni Salud.
Sa pagka karon, si Campbell nagbitbit og tulo ka titulo, samtang si Pacquiao adunay upat -- ang WBC International super featherweight, WBC super featherweight, Ring Magazine super featherweight ug ang WBC lightweight.
Sa kinatibuk-an, si Pacquiao misakmit og upat ka korona sa nagkalain-laing weight categories nga naghimo kaniya nga maoy labing unang boksidor sa Asya nga nakaangkon sa talagsaong kadaugan.
Naghari sab siya kaniadto sa WBC flyweight ug IBF super bantamweight division.
Alang sa away ni Campbell, si Salud nagkanayon nga magpaabot una sila ug timbang- timbangon ang tanang opsiyon kay ang American hard-puncher gikatakda man nga modepensa sa iyang titulo batok sa undefeated WBO jr lightweight champion Joan Guzman sa Dominican Rebublic unya sa Septiyembre 13 adto sa Estados Unidos sa wala pa matino nga binyu.
“We’ll have to wait for the result of Cambpell upcoming fight. Maybe after that, we can already plot who really is up next for Manny. Ricky Hatton is also highly considered but I believe that fight will happen in 2009 yet,” matud ni Salud.
Si Pacquiao miabot sa miaging adlaw ug misaad nga mohatag og P3M (US$65,000) ug mohimo og fund-raising concert alang sa mga biktima sa bagyong “Frank” nga mikusokuso sa nasud duha ka semana na ang milabay.
Ang 29-anyos nga si Pacquiao gitudlo ni President Gloria Macapagal Arroyo nga embahador alang sa Beijing Olympics sunod bulan. Siya maoy gitahasan nga mopas-an sa nasudnong bandila atol sa opening ceremony sa labing daku ug bonggang multi-sport conclave.
Si Pacquiao gikatakdang mobalik sa iyang yutang natawhan sa General Santos City ugma diin laing “hero’s welcome” ang nagpaabot kaniya.