Nag-agi una og kulba apan nakalingkawas sa makuyaw nga kahimtang ang Cebu Lite Trading dihang ilang giusikan ang 19 puntos nga labaw batok sa mas batan-on nga Unilink Shipping ug mi-iskor og 79-73 nga kadaugan aron pagsakmit sa korona sa Vic Enterprises 2008 Invitational Cup kagahapon didto sa CEC gym sa dalan Dimasalang ning dakbayan.
Nahanaw daw bula ang 52-33 nga labaw sa Cebu Lite sa may kataposang tres minutos sa third quarter tungod sa kusganong rally nga gihimo sa Unilink.
Wala dangti og dugay, kalit lang nabuhi ang paglaum sa Unilink dihang misikit sila ngadto sa 73-75, may 1:18 pa ang nahibiling oras pinaagi sa pagpauwan og puntos gikan nilang Martin Grogard ug Paul Gabatan apan wala sila kasustenir kay nalipong sila tungod sa pressure ug sa hugot nga depensa sa mga beteranong sakop ni playing coach Dr. Boy Te.
Si Grogard misipyat sa iyang tirada nga mao untay makatabla sa duwa ug dayon nakahimo sila’g krusyal nga sayop sa ila untang tinguha nga makalabaw.
Sila si Inting Reyes ug Jimbo Noel mipasulod sa ilang kataposang duha ka free throws aron pagselyado sa kadaugan sa iskor 79-73.
“It might not be an easy win but we we’re able to prove that defense really matters.We somehow tended to relax after a big lead but my players soon realized how important is a championship game and they responded. I thank my players for the efforts and I thanked God for our victory,” malipayong batbat ni coach Te.
Ang team manager sa Cebu Lite nga si Dr. Oliver Seno nagkanayon nga nakabentaha sila sa experience ug mas determinado silang modaug mao nga wala sila magpadala sa pressure dihang mihulga ang batan-ong grupo sa Unilink.
Sa preliminary, ang Golden Lines Shipping ni commisioner George Uy midaug batok sa 100 Plus Isotonic Drink, 77-73 aron pagtapos sa ikatulong pwesto.
Si Reyes ug ang kilas kaayo nga pointguard nga si Lito Navarro maoy nangu sa Cebu Lite sa parehong 14 puntos ug si Noel may 12 puntos sundan ni Rey Maraño nga may 11 puntos. Sa gihapon, si Grogard maoy nangu sa Unilink sa iyang 24 puntos.
Puntos kada usa:
First Game: for 3rd place
Golden Lines (77) — Jayme 23, Lim 14, Sestoso 10, Cenabre 8, Armenion 8, Uy 5, Aballe 4, Abellon 3, Suico 2
100 Plus (73) — Luces 18, Dee 14, Maranga 13, Rosito 12, Nadera 8, F. Estorba 8
Second Game:
Championship
Cebu Lite (79) — Reyes 14, Navarro 14, Noel 12, Maraño 11, F. Te 7, Esma 7, Ocampo 4, Seno 4, Sasing 4, Labilles 2
Unilink (73) — Grogard 24, Baclay 11, P. Gabatan 10, Yap 7, Doblas 6, Narvasa 5, Datan 4, Benci 4, Cabiluna 2 Halftime: 34-26.