Migawas nga katin-awan nga pilde gyud pinaagi sa split decision si Florante Condes atol sa pagdepensa sa iyang International Boxing Federation minimumweight title batok sa Mehikanong si Raul 'Rayito' Garcia didto sa La Paz, Mexico.
Mitumaw ang pagduda dihang ang ring announcer igo lang mibasa sa mga iskor nga wala mohingan sa mga judges ug ingon man sa ilang scorecards.
"The fight actually ended in a split decision," matud pa ni IBF Championship Committee Chairman Lindsey Tucker.
Si judge Abraham Pacheco sa Hawaii mi-iskor og 115-112 pabor ngadto ni Condes. Si judge Alejandro Lopez sa Mexico mihatag og 115-112 alang ni Garcia.
Nabuak ang panagtabla dihang si Adelaide Byrd sa America mi-iskor og 118-110 pabor ni Garcia bisan pa si Condes mi-iskor og knockdown sa final round.
Si Byrd mao sab ang responsable sa controversial split decision sa away nilang Mike Arnaoutis ug Ricardo Torres alang sa bakanteng WBO 140 pound title diin si Torres midaog.
Si Harry Davis mi-iskor og 114-113 ngadto ni Torres ug si Jerry Roth mihatag og 114-113 pabor ni Arnaoutis, samtang si Byrd mi-iskor og 116-112 pabor kang Torres. (YRA)