Nakalingkawas ang Riverside gikan sa makutas nga duwa pinaagi sa pagpukan sa Caimitohan, 62-60 ug ingon man pag-angkon ang ikatulong luna sa SK Barangay Sapangdaku Summer Sports League 2008 didto sa Sitio Lupa Basketball Court sa nahisgutang barangay.
Unang nakabuylo ang Caimitohan pagsugod sa duwa diin milabaw kini og dos puntos, 16-14, apan nailog sa Riverside ang momentum sa second quarter ug mao na ang nakabentaha og dos puntos, 30-28 sa first half.
Luyo sa paningkamot ni Nolia, nainat ang labaw sa Riverside ngadto na sa sayes puntos sa iskor nga 48-42. Hinuon, dali ra sab kining napapas dihang gitubag kini sa Caimitohan. Mi-aksiyon pa og ilog sa labaw ang Caimitohan, apan pakyas kini kay nahutdan na kini sa oras.
Si Nolia, kinsa mao lang ang bugtong mi-iskor og double figures nga adunay 12 puntos maoy nangulo sa Riverside, samtang ang pilderong Caimitohan gipangulohan sab ni Bata Labra sa iyang 15 puntos.
Ang SK Barangay Sapangdaku Summer Sports League 2008 gipasiugdahan sa Sangguniang Kabataan pinangulohan ni Hon. Adroel Jay Gacayen ug ingon man sa pag-abag sa Barangay Council ubos sa liderato ni Brgy. Capt. Henreo G. Labra.
(Arnie P. Atuel, CNU Communication Intern)