Mirehistro og daog ang Brgy. Sambag 2 human nila gipilde ang Brgy. Apas, 92-90 sa double round eliminations sa Cebu City Inter-Barangay Sportsfest 2008 niadtong Domingo didto sa Barangay Ermita Sports Complex.
Init kaayo ang duwa sa Brgy. Apas sa first quarter ug ilang nalubong og 11 puntos ang Brgy. Sambag 2 sa iskor nga 26-15. Bisan pa sa maong labaw nakamaneho gihapon ang Brgy. Sambag 2 pagtabla sa duwa, 40-all paghuman sa first half.
Human sa break hinay-hinay nga mipahungaw sa ilang kainit ang Brgy. Sambag 2 hangtod nga mi-ulbo kini sa katapusang kuwarter.
Sikit kaayo ang lahugay sa fourth quarter ug nahimong kulbahinam ang aksiyon dihang nagligas lang kini og uno punto, 83-82. Ang torotoy nga si Demitria mipasulod og usa sa iyang duha ka free throws aron hatagan ang Brgy. Sambag 2 og dos puntos, 84-82.
Mibalik ang kakulba sa duwa dihang nakatabla ang Brgy. Apas, 84-all, apan didto ra kutob ang ilang paningkamot kay ang Brgy. Sambag 2 mipatuman man og hugot nga depensa ug mipatuasik sa ilang opensiba hangtod na sa pagkapupos sa oras sa duwa. (Orchids Lapingcao, CNU Communication Intern)