Ang team Dumanjug ni coach Julian Macoy mitapos sa ilang kampanya sa first round sa eliminasyon sa League of Municipalities of the Philippines (LMP)-Developmental Basketball Tournament pinaagi sa pagkulit og 86-76 nga kadaugan batok sa Ginatilan niadtong miaging adlaw didto sa Dumanjug Friendship gym.
Si Simon Bigno miburak og 30 puntos, samtang ang managsuong Kristian ug Ronilo Quirante nagkumboya og 30 puntos. Si Kristian mipupo og 16 puntos ug si Ronilo miani og 14 puntos aron tabangan ang Dumanjug pagpakgang sa ilang tulo ka sunod-sunod nga kapildihan.
Si Mark Fernandez mikulit sab og double digits alang sa Dumanjug sa iyang 11 puntos.
Ang Dumanjug wala na molingi pa human milabaw og sayes puntos, 41-35 sa halftime paingon na ngadto sa pagposte sa ilang ikaduhang daog sud sa lima ka duwa.
Nangulo sa pilderong Ginatilan mao si J. Tocao sa iyang 30 puntos.
Ang Dumanjug manulong sa Malabuyoc karon adlawa alang sa second round.
Ang Dumanjug nasakop sa south cluster diin ilang gikauban ang Malabuyoc, Moalboal, Barili, Alegria ug Ginatilan.
Puntos Matag Usa
Dumanjug (86) -- Bigno 30, K.Quirante 16, R. Quirante 14, Fernandez 11, Sandot 8, Dela Vega 6
Ginatilan (76) -- Tocao 30, Lampaug 25, Biadnes 6, Liwanagan 4, Sabanal 4, Enad 3, Lavares 3, Oroc 1