Kun walay magpaubos sa duha ka kampo -- ang Samahang Basketbol ng Pilipinas (SBP) ug ang Basketball Association of the Philippines (BAP) walay makuhang kaayohan ang basketbol sa atong nasud.
Nagpasabot kini nga ang mga basketbolista maoy naparot kay masuspenso man usab og balik sa mga international competitions.
Mao kini ang gibuhiang komentaryo ni Philippine Sports Commission (PSC) Chairman William 'Butch' Ramirez, kinsa mibisita dinhi sa Sugbu kagahapon alang sa duha ka dakung katuyoan -- ang blessing sa bag-ong regional office sa PSC ug ang pag-turnover sa mga ekipo alang sa gymnastics nga nagkantidad og dul-an 25 milyones pisos.
Sumala pa ni chairman Ramirez nga wala siya’y gidapigan bisan asa sa SBP ug BAP bisan pa sa iyang pag-angkon nga didto siya sa piniliay sa BAP kay katungdanan sa iyang opisina sa pag-atiman kun unsay angay buhaton tungod kay ang basketbol ubos man sa National Sports Association (NSA).
Bisa’g asa sa duha nga modangop og panabang sa PSC iya gyud atimanon ilabi na kun alang sa kaayohan sa basketbol.
Giangkon ni Ramirez nga lisud kaayo nga balibaran ang imbetasyon sa usa ka politiko kay kasagaran, diha sab mag-agad ang kapalaran sa mga sports leaders ilabi na sa tabang pinansiyal kay sila man ang duol sa luwag ni Presidente Gloria Macapagal-Arroyo.
Iyang gitataw nga karong Hunyo 12 atol sa piniliay sa SBP, iya sab kini nga tambungan ilabi na kay kaila sab sila ni Manny Pangilinan.
Nagkanayon si Ramirez nga kun aduna lang untay magpa-ubos ug isalikway ang ilang garbo wala untay motumaw nga problema.
Si Ramirez mihatag og upat ka epektibong lamas nga posibleng maoy makagiya sa nasud pagkab-ot sa dugay nang gidamgo nga Olympics gold medal ug kini mao ang focus o pagtutok og maayo sa usa ka gimbuhaton nga angay hatagan og pagtagad, commitment o paggahin og oras, endurance o pagsakripisyo ug love of country o pagmahal sa nasud nga natawhan sama sa gipakita sa atong mga bayani.