Ang umaabot nga away ni ALA Stable sensation AJ 'Bazooka' Banal batok ni Panamian Rafael 'El Torito' Concepcion alang sa bakanteng World Boxing Association (WBA) super flyweight title gikatakda karong Hulyo 26 diha sa Cebu Coliseum.
"It's already final. Banal's world title fight will be held on July 26 at the Cebu Coliseum," sumala pa ni ALA Promotions president Michael L. Aldeguer.
Ang maong world title fight gipasiugdahan sa ALA Promotions ug Golden Boy Promotions ug sa abag sa ABS-CBN.
Si Banal mipakamang ni WBC ranked No. 2 Cahil Herrera sa Uraguay sa ikaupat nga hugna sa miagi niyang away niadtong Abril 6 sa Araneta Coliseum, samtang si Concepcion katapusang miwadwad sa iyang abilidad niadtong Marso 27 diin iyang gipatikangkang si Jean Piero Perez sa ikatulong hugna.
Si Banal, 19, nagbitbit og way mansang baraha nga 17-0-1 uban ang 14KOs, samtang si Concepcion, 25, nagkupot og baraha nga 10-2-1, 6KOs.
Si Banal mao ang kasamtangang WBO Asia-Pacific jr bantamweight champion, samtang si Conception mao karon ang Central American Boxing Federation 115-pound champion.