Ang Duljo Fatima walay puangod nga milubong sa Barangay Mambaling sa iskor nga 107-77 sa nagpadayong Inter-Barangay Summer League seniors division didto sa Duljo Fatima Sports Complex.
Mipahaguros sa ilang opensiba ang Duljo Fatima sa pagsugod, apan wala magpa-alkanse ang Mambaling ug mibawos sab kini pagpatuasik og mga puntos hinungdan nga nagligas lang kini og uno punto paghuman sa first quarter, 26-25 pabor sa Duljo-Fatima.
Grabe kaayo kainit ang mga kamot ni Rommel Perez dihang mipasulod kini og nuybe puntos sud lang sa second kuwarter aron pag-inat sa labaw, 48-40 sa first half.
Ang Duljo-Fatima nga walay katagbawan miinat og maayo sa ilang labaw ngadto sa 30 puntos aron pagseguro sa ilang kadaugan.
Ang Inter-barangay Summer League usa ka proyekto sa Cebu City Government sa paningkamot ni Councilor Sylvan 'Jack' Jakosalem, Committee on Sports uban sa pakig-alayon sa Cebu City Sports Commission.