Nakaangkon og luna sa finals ang undefeated University of San Carlos (USC) Warriors ug Team GGC human sa ilang kadaugan sa semifinals sa ilang tagsa-tagsa ka dibisyon sa 1st Mayor Duke Frasco Volleyball Open kagahapon didto sa Lilo-an gym.
Ang reigning Cebu Schools Athletics Foundation, Inc. (CESAFI) champion USC Warriors ni coach Eugene dela Cerna mipukan sa Team Paul Yu sa makutas nga upat ka sets, 25-14, 20-25, 25-18, 25-19.
Ang dili mapugngan nga mga atake ni two-time CESAFI MVP Roderick Arenasa, Edward Carlo Tecson ug sa suporta nilang Kenneth Bensig, Jesriel Pino ug Bonvie Estrera maoy yawi sa kadaugan sa banggiitang USC Warriors.
Sa pikas bahin, ang Team GGC nga gibitoonan sa mga tang-ang magduduwa sa Sugbu nakasinati og kapildihan sa first set sa wala pa nila maangkon ang lingkoranan sa final batok sa Team Paul Yu sud gihapon sa upat ka sets nga engkuwentro, 21-25, 25-11, 26-24, 25-21.
Nakuratan ang Team GGC dihang giangkon sa Team Paul Yu ang first set, 25-21. Hinuon, nakabawi ang Team GGC ug ilang giharos ang tulo ka sets luyo sa paningkamot nilang Janeth Ponte, Florian Gutierrez, Jusabelle Brillo, Janez Armie Igot, Marissa Lagancia, Kenneth Garces ug Kimberly Gendrauli-Dabatos.
Sa laing aksiyon sa semifinal, ang Lilo-an’s Designer Team nga gipangulohan ni Jhunrey Sasing ug James Ryan Rivera miharos sa Talisay City Selection, 25-14, 25-21, 25-22.
Wala sab magpapiri ang Team Consolacion ug ilang gibuntog ang University of Southern Philippines Foundation (USPF) Lady Panthers, 25-20, 25-22, 15-25, 25-21.
Ang Team Consolacion nilang Arlene Maloloy-on, Cheche Bohol, Marites Natad ug Irene Montesino mipakita og impresibong duwa aron pagpahilom sa mas batan-ong USPF Lady Panthers.
Naglisod pagdaog ang USPF Lady Panthers nilang SAC awardee Danika Gendrauli, Erika Camille Verano ug Apple Seraum tungod sa kalig-on sa depensa nga gipatuman sa Team Consolacion.
Ang 1st Mayor Duke Frasco Volleyball Open gimugna sa Lilo-an local government uban sa suporta sa Cebu Volleyball Association (CEVA).