Ang mga paborito nga sila si Yannick Guba ug Patrick John Tierro makaduha magsangka sa finals karong adlawa human kini makakuha og luna sa singles ug doubles events sa 2008 Cebuana Lhuillier Men's Open Tennis Championships didto sa Baseline tennis courts, ning siyudad.
Si Guba, kinsa nipakita sa iyang maayong duwa gikan pa sa pagsugod sa torneyo, nipakita sa iyang kabangis aron pagpalagpot ni Ralph Kevin Barte, 6-1, 6-2 sa ilang engkuwentro sa semifinals kagahapon sa singles event.
Wala magdahom si Guba nga iyang mapilde si Barte tungod kay ang naulahi maayo man usab moduwa. Gani iya pa nga napilde ang usa sa mga inilang tennis player sa nasud nga si Johnny Arcilla sa quarterfinals.
Sa laing bahin, ang 22-anyos nga si Tierro midaog sab batok ni Rolando Ruel, 6-2, 6-4 aron pag-angkon og luna sa kampiyonato.
"I want to bounce back against Guba who defeated me in the Lucena tilt. I'll just try my very best because he is a tough player also, he has been so good in the entire tournament. I will do great on my first serves na lang siguro" matud pa ni Tierro.
Ang engkuwentro nilang Guba ug Tierro karong alas-10:00 sa buntag matawag nga rematch kay nag-abot na man sila didto sa Lucena City ning bag-o diin si Guba mipukan ni Tierro, 6-4, 6-3.
Ang no. 1 player sa nasud nga si Arcilla nakatugkad sa finals apan sa doubles category uban ni Tierro, kinsa dugay na niyang gikatimbang sukad pa niadtong 2003.
Ang paresan nilang Arcilla ug Tierro mipukan sa managsuong Arvin ug Rolando Ruel, 6-1, 6-3 sa ilang engkuwentro.
Sa laing duwa sa doubles event, ang paresan nilang Guba ug Elbert Anasta mibuntog nilang Barte ug Niño Alcantara, 6-3, 7-6.
Gawas sa mga tropeyo, adunay kapin sa P100,000 nga ganting salapi ang mabulsa sa mga champions ug sa runners-up ning prestihiyosong torneyo nga gipaluyohan ni Jean Henri Lhuillier.