TARLAC CITY -- Humataw ang Hapee Toothpaste sa third quarter upang igupo ang Burger King, 82-70 sa Game 1 ng kanilang semis series sa 2008 PBL Lipovitan Amino Sports Cup sa napunong Tarlac State University dito.
Angat lang ang Complete Protectors sa 37-32 sa halftime ngunit humataw sila sa sumunod na quarter sa kanilang 27-10 produksiyon para maka-una sa kanilang best-of-five semis series.
Nanguna si Fil-Am Gabe Norwood sa kanyang 18 puntos na produksiyon.
“We played solid defense in the third and that was it,” pahayag ni Hapee coach Louie Alas.
Umabot ang bentahe ng Complete Protectors sa 58-35 mula sa back-to-back baskets ni Norwood at Alfie Grijaldo. Tumapos naman si Mark Borboran ng 15 points.
Habang sinusulat ang balitang ito, naglalaban pa ang defending champion Harbour Centre at San Mig Coffee sa opening game ng kanilang sariling semis series. (Mae Balbuena)