Nakaangkon na og lingkoranan sa semifinals ang Lawis Ughoy pinaagi sa paglubong sa ilang karibal Riverside Giants sa iskor nga 90-75 sa nagpadayong aksiyon sa 1st Barangay Captain Monsanto's Cup niadtong miaging gabii didto sa sitio Laguna hardcourt sa Lorega San Miguel, ning siyudad.
Atol sa ilang mainitong panagtagbo, ang Lawis Ughoy miabante og siyete puntos paghuman sa unang kuwarter sa iskor nga 17-10, apan nakan-an ug midailos sa singko puntos sa first half sa iskor nga 33-28.
Padayong mipa-uwan sa ilang mga puntos ang Lawis Ughoy hinungdan nga nalubong ang Riverside Giants sa iskor nga 61-45 sa ikatulong kuwarter.
Gikan niadto wala na molingi pa ang Lawis Ughoy ngadto sa naggukod nga Riverside Giants aron pagposte sa ilang ikaupat ka sunod-sunod nga kadaugan.
Ang 1st Barangay Captain Monsanto’s Cup gipasiugdahan sa Lorega San Miguel Barkadahan Basketball Association (LSMBBA) ubos sa paningkamot ni Reuel 'Tawi' Robles uban sa pag-abag sa Norkis Yamaha, Stitches and Wear, San Miguel, Pepsi ug Julies Bakeshop.
Puntos Matag Usa
LAWIS UGHOY (90) -- Etcuban 6 , Artis 7, Mella 6, Cuizon 14, Nieres 22, Cañete 4, Velasquez 6, Divebar 4, Mabaga 14, Cinco 7
RIVERSIDE GIANTS (75) -- Mahinay 4, Duhig 6, Ligan 18, Villaceran 26, Poster 2, Aliñabon 19