Mowadwad na sab sa iyang abilidad atubangan sa mga Sugbuanon si IBF Intercontinental super flyweight champion Z 'The Dream' Gorres batok ni Universal Boxing Organization (UBO) bantam-weight champion Nick 'Kanyankole' Otieno nga taga-Kenya.
Mao kini ang gipatin-aw kagahapon ni ALA Promotions president Michael Aldeguer, kinsa nagkanayon nga ang away nilang Gorres ug Otieno maoy main event sa eksplosibong "One More Time" boxing card karong Mayo 31 diha sa Waterfront Cebu City-Hotel and Casino.
Si Gorres katapusang mi-away niadtong Pebrero 2 didto gihapon sa Waterfront nga miresulta sa kontrobersiyal nga split decision batok ni Vic Darchinyan.
Si Gorres orihinal nga gikatakda untang makigharong ni Francis Miyeyusho, apan napilde kini ni Otieno niadtong Abril 5 hinungdan nga ang na-ulahi maoy nakaangkon og katungod nga moharong ni Gorres.
Si Gorres, ang kasamtangang IBF No. 4 jr. bantamweight contender, kinahanglan nga mohimo og impresyon batok ni Otieno gumikan kay usa man kini sa posible niyang hagdanan aron makakatkat ngadto sa laing world title fight.
Dili sayon nga kontra si Otieno ug gani sa katapusan niyang pagdepensa sa iyang korona, iyang gipakamang si Francis Matthew sud lamang sa usa ka hugna niadtong Abril 10.
Sa supporting main event, si kanhi WBC flyweight champion Malcolm 'Eagle Eye' Tuñacao, kinsa dugay nang wala makapakita'g aksiyon sa Sugbu, mobalik og pamuksing human sa usa ka tuig nga pahulay.
Masuta kun wala pa ba tay-i ang iyang abilidad sa iyang pakigsinukmagay ni Tanzania Professional Boxing Commission (TPBC) bantamweight champion Rashid Ally.
Sa lain pang eksplosibong aksiyon, sila si Jason Pagara sa Cagayan de Oro City ug Heri Andriyanto sa Jakarta, Indonesia magbugno alang sa WBO Youth lightweight championship.
Mobanat sa undercard mao si Juan Miguel Elorde sa Manila batok ni Racem Laud sa Bacolod City.