Gipasalig nilang Rodel ‘Batang Mandaue’ Mayol ug Bert ‘Ninja’ Batawang nga mopakita og impresibong away atol unya sa ilang panagsangka batok sa managlahing kaatbang sa Thailand sa “Back on Track’ double main event card ugma sa gabii sa Cebu Coliseum.
Si Mayol (23-3, 18KOs) kinsa moaway atubangan sa mga dumadapig sa labing unang higayon sud sa unom ka tuig, makigbugno ni Wisan So Suchanya (9-6-1) sa 10 ka hugna nga non-title fight, samtang si Batawang (51-7, 35KOs) moharong ni Samransan Singmanassak (32-13-1, 26KOs) sa 12 ka hugna nga kumbati alang sa WBO Oriental light flyweight championship.
“Dugay na kaayo ko nga wala maka-away dinhi sa Cebu ug daku nakong pasalamat ngadto ni Sir Sammy (Gello-ani) nga gihatagan ko niya’g oportunidad,” matud pa ni Mayol atol sa press conference kagahapon didto sa Hotel Fortuna nga gipanag-iya ni Lorenzo ‘Chao’ Sy.
“Kining awaya maoy mosukod sa akong abilidad kun makaaway ba ko’g world champion sa umaabot o moretiro sa pamuksing,” dugang pa ni OPBF minimumweight champion. “Kahibalo ko nga lig-on ang akong kontra, apan ako siyang tumbahon aron makahimo og impresyon.”
Sa iyang bahin, si Batawang wala moluwat nga iyang tumbahon ang iyang kontra, apan namahayag nga kun makahigayon dili kini niya palabyon.
“Dili ko mosaad og knockout tungod kay wala mi kahibalo unsay mahitabo sa ring. Ako lang paninguhaon nga makapakita ko og maayong away,” matud pa ni Batawang.
Sama ni Mayol, si Batawang napukan sab pinaagi sa TKO sa iyang kampanya pagpalagpot ni WBC lightweight titlist Ulises Solis sa Mexico, nga nakapaaghat ni international promoter Sammy Gello-ani pagngan sa iyang comeback venture sa Cebu boxing promotion og “Back on Track.”
“This is just the beginning of several events that you will be witnessing in Cebu,” matud pa ni Gello-ani.
Sa supporting bouts, si kanhi PBF flyweight champion Federico 'Magnifico' Catubay (20-14-3) sa SGG Stable moharong ni Brix Bomb Ray sa Tony Dacer Stable sa Davao, samtang si Pedro Malco sa Zamboanga City moharong sa way pildeng si Eric Macas (8-0, 5KOs) sa Bong Yap Stable.
Moladlad sa ilang abilidad sa preliminary bouts mao sila si Roemart Sentillas (3-0) batok Ed Earl Orellano (4-0-1), Roldan Castrodes (6-0) batok Jerome Buntog (1-3-1), Rodel Adelmita (4-0) batok Edzel Tuñacao (2-0-0), Ryan Tampus batok Jerome Aguirre ug Ariel Adan batok Arnel Dunal.
Ang mga tiket nagkantidad og P50 sa general admission, P100 sa upper box, P250 sa lower box ug P500 sa ringside.