Naka-eskapo ang reigning titlist Convergys bitbit ang 71-69 nga kadaugan batok sa Etelecare alang sa ilang ikaduhang sunod-sunod nga daog sa 2008 Inter-Call Center Basketball Tournament didto sa City Sports Club-Cebu gym.
Nakabentaha ang Etelecare og sayes puntos paghuman sa first half, 28-22, apan ang Convergys miarangkada sa ikatulong kuwarter aron pagtabla sa duwa, 50-all.
Nakasinati og daghang pagsulay ang Convergys apan sa ilang kaisog ug determinasyon naangkon nila ang kadaugan gikan sa Etelecare.
Si Rondell Cacnio mibugha og 18 puntos ug si Gerwin Rebalda miabuno og 14 puntos alang sa Convergys nga nagsawo sa liderato sa managsamang 2-0 nga baraha.
Si James Jaro mao sab ang nangulo sa pilderong Etelecare sa iyang 14 puntos. Si Franco Angelo Cipriano miamot og 12 puntos alang sa maong kapildihan.
Sa laing bahin, ang People Support nakalingkawas sab batok sa Qualfon sa iskor nga 59-57.
Sila si John Paolo Escudero ug Raymond Jimenez maoy nangulo sa People Support nga mitusak og 12 puntos matag usa.
Milansang sab og 12 puntos si Jopher Regidor aron pangulohan ang Qualfon nga nagtangag og 1-1 win-loss record.
Puntos Matag Usa
Convergys (71) - Cacnio 18, Rebalde 14, Esteban 10, Jumarito 9, Villarin 8. Jalapit 5, Codilla 3, Sugatan 2, Sarmiento 1, Beatingo 1
Etelecare (69) - Cipriano 14, Jaro 12, Becerial 11, Arce 8, Mangubat 6, Castaneda 5, Morin 3, Adolfo 4, Lauron 2, Obina 2, Villaluz 1. (Yoyo R. Abayan)