Ang Daks Kakanin Corner nagsandig sa pagkamabayanihon nilang Fritz Villamor ug Paul Alelu Flores aron pagbuntog sa inilog nga Sherilin Plastics-Atan Guardo og usa lamang ka punto, 68-67 ug ingon man pagsakmit sa kampiyonato sa 2008 K Gallery First Conference Basketball Tournament didto sa Visayan Glass Gym sa Brgy. Guadalupe, ning siyudad.
Ang Sherilin Plastics-Atan Guardo labaw og tres puntos sa nahabiling dos minutos sa duwa, apan si Villamor milansang og 3-pointer aron pagtabla sa iskor. Human mapakyas ang Sherilin pagmugna og maayong opensiba sa ilang posisyon, si Flores mipasud og malisud nga lay-up aron paglabaw sa hingpit sa Daks Kakanin.
Aduna pa untay purohan ang Sherilin nga modaog sa nahabiling sayes segundos sa duwa, apan nahanaw kini daw aso human kini makamugna og turnover dayong kahurot sa oras.
Si Villamor miratsada og game-high 32 puntos, samtang si Flores midugang og 17 puntos hinungdan nga ilang gisaw-an ang Finals MVP award.
Si Daks Kakanin playing coach ug team owner Dakila Mutia malipayon kaayo sa gipakitang kadasig sa iyang mga players, nga mi-abante sa finals human gibihag ang lain pang inilog nga San Remigio Beach Club (SRFC), 73-68.
Si Laly Cabrera mitali og 17 puntos ug si Lanutan mi-amot og 15 alang sa Sherilin nga napiangan og maayo kay wala motunga ang ilang upat ka mga sinaligan.
Si tournament commissioner Sidney Kiamco mismo maoy mitunol sa tropeyo ug sa P12,000 nga ganti ngadto sa Daks Kakanin. Ang Sherilin-Atan Guardo mibulsa og P5,000.
Gipasiugdahan sa K Gallery Frames, ang maong usa ka bulan nga torneyo gipaluyohan sab sa Alberto's Pizza, The Outpost ug ni Atty. Jefrey Pabriaga.
PUNTOS MATAG USA
Daks Kakanin (68) - Villamor 32, Flores 17, Lim 8, Gordones 5, Cabiles 3, Arsua 3
Sherilin (67) - Cabrera 17, Lanutan 15, Plant 13, Gines 11, Estella 7, Lim 4