Ang Private Schools Athletic Association-VII nga gilangkuban kasagaran og mga atleta gikan sa Sugbu mosugod karon sa ilang kampanya sa 2008 PRISAA National Games sa Joaquin Enriquez Memorial Sports Complex sa Zamboanga City.
Ang basketball team sa Region-7 mohimo dayon og title defense batok sa Region IV-A karong alas-8:30 sa buntag.
Ang PRISAA-VII nga girepresentahan sa mga magduduwa gikan sa University of San Carlos ug mikuha kini og reinforcements gikan sa University of San Jose-Recoletos na-bracket uban sa regions 1, 2, 4, 5 ug host Zamboanga.
Karong alas-9:30 sa buntag, ang Central Visayas cagebelles moharong sa host Zamboanga. Ang USC Wariorretes naglaum nga ila na nga madaog ang bulawan human ang University of Cebu (UC) Lady Webmasters napakyas pagdaog sa miaging tuig nga edisyon sa tinuig nga athletic meet.
Sa laing bahin, ang Region-7 table tennis squad mopakita sa ilang unang duwa batok sa Region V.
Uban sa bracket sa Region 7 sa men’s volleyball squad mao ang Regions 6, 9, 10, 11 ug 12.
Gawas sa ballgames, ang tigiay sa athletics, swimming, badminton, chess ug karatedo sugdan karong adlawa.
Sa miaging tuig, ang PRISAA-VII nahimutang sa ikatulo nga dapit sa overall sa usa ka semana nga kompetisyon nga miugkat og 43 gold, 67 silver ug 50 bronze medals.