Human sa 19 ka tuig nga paghilom, gibanhaw na sab sa dakbayan sa Mandaue ang duwang volleyball pinaagi sa pagpahigayon og Mandaue City Mayor’s Cup 2008 volleyball tournament didto sa Mandaue City volleyball courts.
Adunay 24 ka barangay nga sakop sa nahisgutang dakbayan ang misalmot sa maong kompetisyon.
Ang Jagobiao mipukan sa Banilad sud sa tulo ka hugna, 25-23, 25-16, 25-19. Ang Jagobiao nagsalig sa maayong performance ni 2007 Nestea Beach volley champion ug GUV CUP’s best server awardee Janiz Igot.
Sa laing duwa sa women's division, ang Canduman wala mahago pag-angkon og daog dihang wala motunga ang Ibabao.
Sa men’s bracket, yano ra usab nga midaog ang Subangdaku dihang ilang gilubong ang Alang-alang, 25-8, 25-15. Ang Subangdaku gipangulohan sa two-time Cesafi MVP Roderick Areanasa ug ni Edward Carlo Tecson.
Ang kanhi RP team member nga si Jerome Capada, mao sab ang nangulo sa Ibabao pagpulbos sa Banilad sud sa tulo ka hugna, 25-22, 13-25, 25-16.
Sa lain pang mga duwa, ang Umapad mipukan sa Cubacub, 25-19, 25-21 samtang gipukan sab sa Cabancalan ang Pagsabungan, 25-19, 18-5, 25-20.
Ang mga duwa himuon matag adlaw'ng Sabado ug Domingo diha gihapon sa Mandaue City volleyball courts.