Daanbantayan – Gipadayag ni Mayor Sun Shimura ang iyang hugot nga pagsuporta sa ipahigayong 1st Mayor's Cup Beach Volleyball Tournament karong Sabado ug Domingo adto sa Malapascua, sa Bantayan island.
Adunay giandam nga P15,000 ganting salapi nga i-apod-apod ngadto sa mga mananaog.
Ang Cebu Volleyball Association (CEVA) ug ang kagamhanan sa lalawigan sa Sugbu mipasiugda ning maong kalihukan aron ikapakita ang mga matahom nga baybayon nga haum usab sa beach volleyball tournament.
"We are delighted to have Malapascua Island chosen to be the venue of this prestigious tournament," matud pa ni Gregg Rubio, ang tourism officer sa Daanbantayan.
Matud pa usab sa mga opisyal sa CEVA nga gawas sa pag-promote sa isla sa Malapascua, ang pagpahigayon sa torneyo usa sab ka paagi aron masikat ang beach volleyball sa Sugbu. (PR)