Padayon karong naghupot og maayong rekord ang Boston Celtics human makadiskarte og daog pinaagi sa pagpilde sa defending champion San Antonio Spurs sa iskor nga 93-91 kagahapon sa National Basketball Association didto sa AT&T Center sa San Antonio, Texas.
Ang Celtics naghupot na karon og 53-13 nga baraha ug ilang suwayan og santa ang 22 ka sunod-sunod nga daog sa Houston Rockets nga ilang sulngon karong adlawa didto sa Toyota Center sa Houston, Texas.
Bisa’g wala si Ray Allen tungod sa nahiagomang injury, wala panumbalinga sa Celtics ang kalangas sa mga dumadapig sa Spurs kay bisa'g nabiyaan sila og 10 puntos sa halftime, 43-53, nakahimo gihapon sila pag-rally aron pagtilaw og labaw sa labing unang higayon sa third quarter sa iskor nga 56-55.
Si Paul Pierce maoy nagtimon sa kadaugan pinaagi sa pagpabuto og 22 puntos, si Kevin Garnett mitampo og 21 puntos ug si Rajon Rondo miamot og 20 puntos.
Nakakuha sab ang Celtics og dakung suporta ni Sam Cassell kinsa mi-iskor og 17 puntos.
Ang Spurs nga adunay 44-23 nga baraha, gipangulohan ni Manu Ginobili sa iyang 32 puntos, samtang si Tony Parker kinsa maoy nakapasulod sa katapusang basket sa Spurs mitampo og 17 puntos. Si Tim Duncan igo lang nakaabot og 10 puntos.
Si Cassell maoy nakapalabaw og balik sa Celtics sa fourth period pinaagi sa iyang three-pointer, 89-87 sa nahabiling 46 segundos sa duwa.
Sa lain pang mga duwa, mibatog og balik sa ikawalong puwesto sa Eastern Conference ang Atlanta Hawks human makatukob og daog batok sa Washington Wizards sa iskor nga 105-96, ang Indiana Pacers midaog batok sa New York Knicks sa iskor nga 110-98, gipakaging sa Orlando Magic ang Cleveland Cavaliers sa iskor nga 104-90.
Midaog sab ang Memphis Grizzlies batok sa Charlotte Bobcats sa iskor nga 98-80, ang Minnesota Timberwolves mimakmak sa Los Angeles Clippers sa iskor nga 99-90, ang New Orleans Hornets mi-ihaw sa Chicago Bulls sa iskor nga 108-97 ug ang Utah Jazz milubong sa Toronto Raptors.