Gipanitan sa Pajo Selection sa Lapu-Lapu City ang bangis nga Don Bosco Greywolves sa iskor nga 78-71 aron paglangkat sa kampiyonato sa 1st Hapee-Online Challenge Cup Under-17 basketball tournament niadtong Domingo didto sa barangay Cogon-Ramos Sports Complex.
Ang labaw pang bangis gikan sa Lapu-Lapu maoy midala sa duwa gikan sa pagsugod ug miposte kini og 10 puntos nga labaw paghuman sa unang kuwarter.
Ang Pajo kinsa miangkon sa katapusang lingkoranan sa final human gipilde ang Center for International Education (CIE) Lions nakahimo og daghang turnovers nga nakahatag og higayon sa Bosconians pagkitkit sa labaw, 70-68 sa nahabiling dos minutos sa duwa.
Hinuon nakabangon og balik ug maampingon na kini sa ilang duwa aron maangkon ang gimithi nga kadaugan.
Si Allan Sala maoy nangu sa Pajo sa iyang 42 puntos ug mao sab ang "Dewfoam Best Player of the Game."