Dili maayong balita ang mi-abot sa kampo ni Manny Pacquiao atol sa bisperas sa gi-atngan niyang rematch batok sa Juan Manuel Marquez gumikan kay ang iyang manghod nga si Bobby gipalukapa sud lamang sa usa ka hugna ni WBC No. 2 super featherweight contender Urbano Antillon kagahapon didto sa Hard Rock Hotel and Casino sa Las Vegas, Nevada.
Segun sa taho sa fightnews.com, si Antillon mibayo og kulata ni BobPac lakip na niini ang duha ka sunod-sunod nga left hook nga maoy nakapatikoko sa manghod ni Pacman.
Mora'g nahutdan og hangin niadtong tungora si BobPac hinungdan nga wala na kini makabarog pa. Gi-undang ni reperi Joe Cortez ang away sa oras nga 2:49.
Mao kadto ang ikaduhang sunod-sunod nga daog ni Antillon pinaagi sa knockout sud sa unang hugna.
Gumikan niini, si Antillon nagpabiling way pilde sa 22 ka away diin 15 sa iyang mga biktima ang gipalukapa. Samtang si BobPac nanaog ngadto sa 28-14 (13KOs) human makasinati sa iyang ikaupat ka sunod-sunod nga kaparotan.
Hinuon ang ubang eksperto sa boksing nagtuo nga ang maong kapildihan ni BocPac dili maka-apekto ni Manny sa paghagit unya niya ni Marquez, ang WBC super featherweight champion sa main event sa "Unfinished Business" ugmang adlawa didto sa Mandalay Bay Resort and Casino sa Las Vegas.
Gani ang igsuon sab ni Juan Manuel nga si Rafael Marquez napilde sab pinaagi sa split decision ngadto ni Israel Vasquez sa ilang rubbermatch alang sa WBC super bantamweight title duha na ka semana ang milabay didto sa Home Depot Center sa Carson, California.