Unom ka teams ang mo-parada karong adlawa atol sa pagbukas sa Power Forty Summer League 2008 President's Cup diha sa Inayawan Sports Complex.
Human sa parada sa nag-unang kadalanan sa Inayawan, isunod dayon ang opening ceremonies ug ang pagpili og "best muse" ug "best in uniform."
Mag-abot sa unang duwa mao ang UTASSCO ni Atty. Flore Yosores batok sa Christine Traders ni El Presidente Vez Eleguin.
Ang defending champion Amihan ni Romy Rama moharong sa DJD Engineering alang sa ikaduhang duwa ug ang ikatulo ug katapusang duwa magsangka ang Fag Machine ni Felix Gacrama batok sa Hero Commando ni konsehal Jojo Ibones sa Cogon, Pardo.
Ang torneyo moduwa og double round-robin series.
Ang makampiyon makadawat og P7,000 nga ganting salapi, ang ikaduha mobulsa og P5,000 ug ang ikatulo modawat og P3,000.
Matud pa ni commissioner Edwin Dejacto, nga gawas sa ganting salapi, ang top three winners hatagan sab og tropeyo.
Giawhag sab ni Dejacto ang mga tag-iya sa matag teams pagtambong sa opening day aron mahimong mabulokon ang maong adlaw.
Ang mga duwa himuon sa matag adlaw'ng Martes sa gabii.