Pulos nabunyagan og kadaugan ang Blessel ug Cyberasta Cafe batok sa ilang tagsa-tagsa ka kaatbang sa pagsugod sa 2008 Colegio
del Santo Niño Basketball Association (CSNBA) Invitational Cup niadtong Sabado didto sa San Nicolas Gym sa barangay San Nicolas, ning siyudad.
Ang Blessel yano kaayong miposte og daog pinaagi sa paglubong sa Bankers sa iskor nga 101-88.
Miarangkada dayon ang Blessel pagsugod pa lang sa duwa ubos sa pagpangulo nilang Custodio, Kokoy Astudillo ug Birao nga pulos mikimada og double figures. Si Custodio maoy namuntos og maayo nga mi-iskor og 21 puntos, gisundan ni Astudillo nga miabuno og 14 puntos samtang si Birao mikandos og 11 puntos alang sa Blessel nga mi-abante og nuybe puntos paghuman sa first half sa iskor nga 49-40.
Gikan niadto, gikontrolar na sa Blessel ang maong duwa ug wala na kini molingi pa sa nabangkarota nga Bankers nga gipangulohan ni Fernandez kinsa miposte og 22 puntos.
Sa duwa niadtong Miyerkules, ang JICT Phonecs ug VHL Sportswear walay puangod nga milubong-buhi sa ilang mga kaatbang.
Ang JICT Phonecs milubong sa Rage Team sa iskor nga 89-65, samtang gilubong sab sa VHL Sportswear ang Colonade Aces sa iskor nga 87-68.
Upat ka players sa JICT Phonecs ang milansang og double figures nga gipangulohan ni Sumayang sa iyang 14 puntos, Joe Lausa nga miamot og 11 ug sila si Salaza ug Ygot nga mitampo og 10 puntos matag usa.
Si Gallarde nga miani og 18 puntos maoy nangu sa pilderong Rage Team.
Samtang ang VHL Sportswear gipangulohan ni Alano nga milansang og 18 puntos, gisundan nilang Casquejo nga miamot og 17 puntos, Misa nga mitampo og 12 puntos ug nilang Edwin Pader ug De Gracia nga pulos mi-iskor og 10 puntos. Ang pilderong Colonade gipangulohan ni Bords sa iyang 14 puntos.