Mokabat ngadto sa P20,000 ang gigahin nga premyo sa 2008 K Gallery Basketball Tournament First Conference nga mosikad pinaagi sa yanong opening ceremonies ugma sa ala-1:00 sa hapon diha sa Visayan Glass Gym sa barangay Guadalupe, ning siyudad.
Katorse ka koponan nga gibuak og duha ka grupo ang mopakita'g aksiyon sa duha ka bulan nga kompetisyon nga gipaluyohan sa Alberto's Pizza, Atty. Jeffrey Pabriaga, Signa Modena ug Robert Rafson Chua.
Mga teams nga magtigi alang sa korona mao ang Kidney Care, San Remigio Beach Club, Bambi Cooking Oil, Hayden, Diakon, Atan Guardo-Sherilin Plastics, Sam's Moondogs, USC Law, Yayoy's Grill, Daks Kakanin Korner, El Deneyroe Convenience Store, Don Alejandro's, BAISA Security Agency ug VL Enterprise.
Ang torneyo mosubay og single round robin format diin ang top two teams sa matag bracket moabante sa crossover semifinals.
Ang mga winners magsangka sa tinaktakay nga kampiyonato.
Gawas sa mga tropeyo, ang kampiyon mobulsa sab og P12,000, samtang ang runner-up modawat og P5,000.
Ang MVP hatagan og P500. (Yoyo R. Abayan)