Buksan na karong Domingo ang 7th San Carlos Boys High Alumni Basketball Association (SCBHABA) nga pagasalmotan og pito ka teams diha sa USC North Campus gym sa dalan Gen. Maxilom avenue, ning siyudad.
Ang pito ka teams mao ang Batch 1980, Batch 1982, Batch 1983, Batch 1985, Batch 1986, Batch 1987 ug ang gipalig-on nga Batches 1970 ug 1981, ang tigpasiugda sa maong torneyo.
Ang tigpamaba sa Batch '70 nga si Jingjing Gacayan, kinsa usa usab ka sakop sa Cebu Professionals Basketball Association (CEPBA), mibutyag nga ang Batch '70 ug Batch '81 gitugotan nga mag-usa tungod kay pulos kini kulang og mga magduduwa.
Gihangop sa ilang grupo ang Batch 81 tungod kay daku kinig ikatabang sa ilang kampanya sa paglangkat sa korona karong tuiga. Sa milabay'ng tuig ang Batch '70 nahimutang lang sa ikatulong puwesto.
Dili pa mahibaw-an kun kinsa ang ikasangka sa Batches '70-'81 tungod kay ipaagi man kini og ripa human sa opening ceremonies sa alas-8:00 sa buntag.
Ang Batches '70-'81 gipangulohan sa ilang team captain nga si Pul Abais, kanhi magduduwa sa USJ-R Jaguar. Ang mga sakop sa team mao sila si Jingjing Gacayan, Bernie Villarosa, Jojie Gelbolingo, Audie Medina, Roel Monterroyo, Dean Wong, Raul Saburnido, Reggie Caballero, Dennis Serrato, Jess Cavalida ug Cesar Briones.
Sa milabay’ng tulo ka tuig, ang Batch '70 gipaluyohan sa Ho Tong Hardware apan karon, ang nagpaluyo nila mao na ang Gemmary Pawnshop.