Padayon nga mikulit og daog ang Atan Guardo-Sherilin, Kidney Care ug Bambi Cooking Oil sa nagpadayong All Cebu Ballers League Basketball Tournament didto sa Guadalupe Sports Complex.
Uban ni Jimbo Custodio, kinsa miposte og career high 32 puntos, ang Atan Guardo-Sherilin yano kaayong mikutlo og daog pinaagi sa paglubong sa House of Hope sa iskor nga 103-81.
Ang House of Hope sa paningkamot
ni dela Cuesta mihulga og gukod apan wala kini makalahutay tungod sa dakung lubong nga gipahamtang sa Atan Guardo ngadto kanila.
Sa laing bahin, ang Kidney Care gilisud-lisud pa una nila maangkon ang 86-81 nga kadaugan batok sa Kia Motors. Ang trayanggulo nilang Totong Villanueva, Dennis ug Jerome Acebron maoy yawi sa maong kadaugan.
Samtang ang Bambi Cooking Oil nga gipangulohan nilang Mike Yong, Mark Villagonzalo ug Dick Castañeda naka-eskapo gikan sa mga kamot sa PhilHealth sa iskor nga 86-83.