Nagpabilin nga walay pilde ang Liloan volleybelles sa gipahigayong 3rd Gwen Garcia Unity Volleyball Cup For Women kagahapon didto sa Mandaue City Cultural and Sports Complex.
Ang Liloan volleybelles mipukan sa Balamban sud sa straight sets, 25-15, 25-8 aron pag-una sa Bracket A uban ang 4-0 nga baraha ug mipalig-on sa ilang kampanya pag-angkon og luna sa semifinals.
Sa gihapon, ang kanhi magduduwa sa USJ-R ug team captain nga si Marites Pepito-Del Mar maoy naghatod sa kadaugan sa Liloan volleybelles. Si del Mar nakakuha sab og maayong suporta nilang Queenie Rivera, Anne Toong, Cyril Rivera ug sa laing magduduwa kanhi sa USJ-R nga si Susana Yuson ug guest player gikan sa Consolacion nga si Arlene Maloloy-on.
Sa bracket B, ang Catmon ug ang Minglanilla nagpabilin sab nga way pilde sa managsamang 3-0 win-loss record, apan magbuwag ang ilang dalan karong Biyernes dihang magsangka kini sa usa'g-usa alang sa liderato sa bracket B.
Ang Minglanilla napukan sa first set, apan ang kombinasyon nilang Janice Sellon ug Vanessa Vane Juezan miatake sa mosunod nga duha ka sets aron pagpukan sa Badian, 22-25, 25-13, 25-16.
Sa laing bahin, ang Catmon nag-agi pa sa makutas nga kumbati una nila mapukan ang lig-on nga Bantayan, 25-23, 31-29.
Gipukan sab sa Balamban ang Sibonga, 25-16, 25-22 alang sa ilang ikaduhang daog sa bracket A.