Nanawagan si Greater Cebu Sports Organizing (GCSOC) chairman Jonathan 'Atan' L. Guardo og usa ka "revamp" sa liderato sa Philippine Sports Commission (PSC) human sa taphaw nga kampanya sa Pilipinas sa bag-o lang natapos nga 24th Southeast Asian (SEA) Games didto sa Thailand.
"With RP's poor showing in the recent SEA Games in Thailand, I personally feel that immediate change must be instituted within our sports system and it must start from the PSC leadership," matud pa ni Guardo, ang notadong Cebuano sports patron.
Ang Pilipinas nahimutang sa ikaunom nga dapit sa overall ug maoy labing maot nga nahimo sa nasud sa biennial sports conclave sud sa 30 ka tuig.
Ang Pilipinas mihakot og 41 golds, 91 silvers ug 96 bronzes. Ang 41 golds nga ilang nahakot wala katunga sa 113 ka golds nga nadaog sa Pilipinas sa 2005 SEA Games diin ang Manila ang host.
Gawas sa Pilipinas, ang host Thailand, Brunei, Cambodia, East Timor, Indonesia, Laos, Malaysia, Myanmar, Singapore ug Vietnam ang miapil sab sa maong kompetisyon diin ang East Timor mao lang ang bugtong nasud nga wala makakabkab og bulawan.
Ang Laos maoy mo-host sa sunod nga SEA Games sa 2009.