Hingpit nang naangkon sa Visayan Ballers ang titulo human gipukan ang Yayoy's Grill and Resto Bar, 82-70 sa 3rd Lucky Tableware Regulars basketball tournament niadtong Domingo sa gabii didto sa Visayan Glass Gym sa Brgy. Guadalupe, ning siyudad.
Nagmangtas og maayo si Martin Grogaard sa Visayan Ballers aron pagkutlo og 20 puntos uban ang walo ka rebounds ug lima ka assists nga igo na kaayo alang kaniya nga ilhon isip Finals MVP.
Si Paul Alvarez miamot og 10 puntos, samtang sila si William Aparri, Robert Rafson Chua ug Dax Navarro nagkumboya og 22 puntos alang sa Visayan Ballers nga wala molingi pa human miposte og 28-17 nga labaw sa unang kuwarter.
Ang Yayoy's Grill nakalabok pa sa sunod nga duha ka kuwarter aron pagkitkit sa labaw, 53-58, apan ang Visayan Ballers milusad og mainitong rally
sa naghinapos nga bahin
sa duwa aron pagselyado
sa 12 puntos niini nga kadaugan.
Nagmaya sab si Dennis Ho sa Visayan Ballers gumikan kay siya man ang naghari sa 3-point shootout ning torneyo nga gipaluyohan ni Florita Vallejo, Mic n' Mat Convenience Store, Artkyob/Alberto's Pizza, Daks Kakanin, ug Hodenz.
Si Rocky Alcoseba maoy nangu sa Yayoy's Grill nga mihaling og 19 puntos, samtang si Ariosa mitampo og 15 puntos.