Gilangkat sa top seeded Christine Traders ug sa second seeded Hero Commando ang bakanteng luna sa semifinals sa Power Forty Basketball
Tournament Christmas League didto sa Inayawan Sports Complex.
Ang Christine makigsangka batok sa Amihan, samtang ang Hero Commando makigharong batok sa Fag Machine diin ang mga mananaog maoy mag-abot sa kampiyonato.
Gipalagpot sa Amihan ang DD Eng’g. pinaagi sa pagpalubong sa iskor nga 100-77, samtang gipalayas sa Fag Machine ang UTASSCO sa iskor nga 78-74 aron pag-abante sa semifinals nga sugdan karong Disyembre 11.
Daw giharian sila si Melvin Layon ug Joey Colinares aron pagbaswat sa Amihan sa ilang makabungog nga opensa. Si Layon miburak og 26 puntos ug si Colinares mikimada og 21 puntos.
Bayenta-sayes puntos sab ang nahimo ni Nilo Abasolo aron pangulohan ang pilderong DJD Eng’g.
Sa laing duwa, naka-ginhawa og lawom ang Fag Machine sa giya ni Konsehal Mario Tabar kinsa miposa og 28 puntos human sa ilang kadaugan batok sa UTASSCO nga gipangulohan ni Alex Mercado kinsa mihakot og 25 puntos.
Puntos matag usa
Unang duwa:
Amihan (100) -- Layon 26, Colnares 21, Ozon 16, Yosores 12, Dejarme 11, Arias 10, Rama 4
DJD Eng’g. (77) -- Abasolo 26, Nacario 22, Gerali 10, Abadejos 10, Reyes 9, Vernaiz 7, Dimitiman 6, Nuñez 5, Nacario 2, Balbanera 2
Ikaduhang duwa:
Fag Machine (78) -- Tabar 28, Mosqueda 14, Yu 11, Fuentes 10, Abasolo 8, Villoga 5, Cabrera 2
UTASSCO (74) -- Mercado 25, Abatayo 16, Yosores 9, Romarez 9, Lisondra 9, Ylaya 5, Labajo 4